دەستەی پەنا، بۆ پەنادانی بێ پەنایان پێکهات…
دەستەی پەنا، بۆ پەنادانی بێ پەنایان پێکهات…
چەند ڕۆژ بەر لەئێستاو لە کۆنفرانسێکی ڕۆژنامەوانیدا، دەستەی پەنا، بۆ پەنادانی بێ پەنایان، دەس بەکاربوونی خۆی ڕاگەند.
ئەم دەستەیە لە ژمارەیەک لە ژنان و پیاوان پێکهاتووە، وەکو خۆیان رایانگەیاند کاریان بەهاناوە چوونی کەسانی بێ سەرپەناو بێ نەوایە، کە بەناچاری و بەهۆکاری جیاواز کەوتونەتە گۆشەو کەناری شاروشارۆچکەکان و سەرشەقامەکان. بەشێک لەو ئینسانە بێ سەرپانایانە، ئازاری جەستەیی یان دەرونی دراون… یان نەخۆشن.
دەستەی پەنا بێ گوێدانە ژن و پیاو بوون، گرنگی بە دۆزینەوەی پەنا بۆ بێ پەنایان و هاوکاریکردنیان دەکات… لەنجە خاوێ وەکو سەرۆکی دەستەکە، رایگەیاند کە ماوەیەکە لەهەوڵی پێکهێنانی ئەو دەستەیەدان و وتیشی، بەشدارانی دەستەکەمان خۆیان دەبنە هاوەڵی نەخۆشەکان و کاریش بۆ گۆرانکاری لە یاساکاندا دەکەن و لەداهاتوشدا، شوێنی داڵدەدان و پاراستن دەکەنەوە، تا چیتر کەسانی بێ سەرپەنا، لەشەقامەکان نەمێنەوەو لەو دۆخە سەختە، ڕزگار بکرێن.
دەستبردنی ئەم ژمارەیە لە لاوان، بۆ بەهانانەوە چوونی کەسانی سەرشەقامەکان و هاوکاریکردنیان تا دروستکردنی شوێن بۆ پاریزگاریکردنیان، جیگای دەستخۆشانەو کارێکی تەواو ئینسانییە، هاوکات بوونی ژمارەیەکی زۆر لە خەڵکی بێ پەنا، لە هەرێمێکدا کە خاوەنی سامانی بێ شومارە، نیشانەی بێدەربەستی دەسەڵاتی سیاسییە، و لەوەش واوەتر جێگای شەرمەزارییە.
ئەم دەستەیە، ئەگەر هاوکاری بکرێن و وەکو خۆیان دەڵێن بەشێوەیەکی سەربەخۆ و ئامانجیان خزمەت بە کەسانی بێ سەرپەنا بێت، دەتوانرێت لە پشتیوانی فراوانی ئینسان دۆستان چ لە باری مادی و چ لەباری مەعنەوە بەهرەمەند بن…