بۆپێشەوە پێی نایە ساڵی پێنجەمەوە! عەبدوڵا مەحمود
بۆپێشەوە پێی نایە ساڵی پێنجەمەوە!
عەبدوڵا مەحمود
ئەمڕۆ بۆپێشەوە پێ دەنێتە پێنجەمین ساڵی بەردەوام بوونی. لەماوەی چوارساڵی رابردوودا، بۆپێشەوە وەکو سەکۆیەکی چەپ و کۆمۆنیست و ئازادیخواز لەمەیداندا بووە.
بۆپێشەوە لەناو دەیان و سەدان کەناڵی بیستراو بینراو چاپکراوی حزبی و ناحزبیدا، ئەهلی و شەخسیدا، هەمە چەشنی سیاسی و کۆمەڵایەتیدا، تاکە بڵاوکراوەیەی چەپ و کۆمۆنیستییە کە بەشیێوەی رێک و پێک و لەکاتی خۆیدا، بە فۆرم و ناوەرۆکێکی تەواو جیاوازەوە دەرچووە.
بۆپێشەوە لە کاتێکدا لەسەر گەیاندنی پەیامی کۆمۆنیستی و ئینسانی و ئازادیخوازانەی خۆی بەردەوامە، کە میدیای هەزار سەری ژەهر هەڵگرتوی بۆرژوازی رەوتەکانیان، لەداهاتی خەڵکی کوردستان و لەموچەی کریکاران و کارمەندان، کۆمەڵگە ژەهر باران دەکەن. ڕاستیە واقعیەکانی کۆمەڵگە دەشارنەوە، حاشا لە ململانێی چینایەتی دەکەن، بڵندگۆی هەموو کەسافەتیکی قەومی و دینی و مەزهەبی و فاشیستی و راسیسیتین، دەنگی هەموو رەوتە هەمە رەنگە سیاسی و دزە حیرفەیەکانن، سەکۆی درۆسازی و پەرەپۆشکردنی راستیەکان و مەینەتەکانی چینی کریکار و بێبەشانن، مینبەری بێئیرادەکردنی ئینسان و بەرەوا نیشاندانی واقعیەتە تاڵەکانی کۆمەڵگەن.
لە باشترین حاڵەتدا میدیای سیبەر و بەناو ئەهلی لەپاڵ هەندێک دەنگی چەورکراوی دەسەڵات و ئۆپۆزیسیۆنی بودەڵەدا، جارجار بۆڵە بۆڵ و رەخنەی روکەش ئاراستەی هەلومەرجی باو و دەسەڵاتی رەشی حزبەکانی دەسەڵات دەکەن، ئامانجی ئەو تیپەش ئەوەیە تا ناوەرۆکی بزوتنەوەی کوردایەتی وەکو بزوتنەوەیەکی بۆرژوازی بشارنەوەو لەو رێگایەشەوە خۆیان بە تورەیی و نارەزایەتی جەماوەریدا هەڵبواسن.
لەنێو سەدان میدیای هەمە رەنگدا، ئەگەر کۆبونەوەو نارەزایەتیەکی کریکاری بە ناچاری و کەم کورییەوە بگوازنەوە، بەڵام باسێک لە مەینەتەکانی چینی کریکار و هۆکارو ریشەی بێمافیەکانیان نابینرێت. ئەگەر بۆڵە بۆڵ و رەخنەیەک لە سیستەمی سیاسی و حزبەکانی دەسەڵات و کارنامەکانیان بگرن، بەڵام ئەو بزوتنەوەیەی لانەی پێگرتن و ژینگەی ئەم حزب و کارنامەکانیانە، بە پیرۆز رادەگرن. ئەگەر رەخنەو تورەیەکیان لە فتوای مەلایەک هەبێت و رەخنەی بکەن، بەڵام رەخنەیەیان لە کۆنەپەرستی نییە. لەگەڵ رەخنە لە مەلاو دیاردەیەکی دینیشدا، جنێوێک و بوختان و تەوهینێک بەمارکس و کۆمۆنیزمیش دەکەن تادڵی خیڵی مەلاو ئیسلامی سیاسی ڕابگرن. ئەگەر هەواڵی کوژرانی ژنێک، یان خۆکوژیەکانیان و تەنانەت گۆرە بی ناونیشانەکانیان نیشان بدەن، بەڵام ئامادەنین هۆکاری پشتی ئەم قەسابخانەیە رابگەیەنن، ئامادەنین بەرگرییەکی شەرمنۆکانەش لە بزوتنەوەی یەکسانیخوازی ژنان بکەن. باسی لاوان و بێ ئومیدیان دەکەنە مانشیت، بێ ئەوەی ریشەی ئیرادە وردکردن و بی ئومیدکردنیان بخەنە ڕوو. باسی گەندەڵی وناشەفافی دەکەن، کەچی خۆیان لەناو گەندەڵستانی دزی وتاڵانچیتدا، نوقمن. باسی نۆکەر پیشەیی حزبەکان دەکەن، بێ ئەوەی رەخنەیەک لە عادەت پیشەیی ئەو خۆشخزمەتییە بگرن.
بۆپێشەوە بە توانایەکی کەم و بەهەوڵی خۆبەخشانەی ژمارەیەک ئینسانی کۆمۆنیست و هاوکاری بێدرێغ، لەناو ئەو هەموو میدیا هەمەچەشنەی بۆرژوازی و رەوتەکانیدا، ئەرکی وەڵامدانەوە بە ماشینی تەبلیغاتی بۆرژوازی و هاوکاتیش رۆڵگێرانی بەوێنەی بڵندگۆی بلۆکی و چەپ و کۆمۆنیزم و نارەزایەتی کریکاریی و جەماوەری، لە ئەستۆ گرتووە.
دەتوانین بلێین بۆپێشەوە، تاکە سەکۆی بلۆکی چەپ و کۆمۆنیزم و نارەزایەتی کریکاریی و جەماوەرییە، کە نەبۆتە پاشکۆی روداوەکان و رۆڵی چاودێری سیاسی ناگێرێت. رەوتی کارکردنی ئاکسیۆنی و خۆبەخۆ و بی نەخشە نییە، بروای بە کاری ریکخراو و ئامانجدارانەیە. سایت و میدیایەک نییە چاوەروانی ئەوە بێت ئەو بابەت و راپۆرت و هەواڵانە بڵاوبکاتەوە کە بۆی دێت، بەڵکو خۆی ئاراستەی بابەت و راپۆرت و خەتەکەی دیاری دەکات و ستافەکەی لەکاتی خۆیدا لەسەر هەر مەسەلەو بابەت و کێشە و دۆسیەیەکی دیاریکراو، لە ڕوانگەی بەشی پیشرەوی چینی کریکار و ئینسان دۆستیەوە، رەخنە دەگرێت و هاوکات بەدیل دەخاتە ڕوو. هەواڵنیری ناکات و پشتی هەواڵەکان و لایەنی شاراوەیان دەخاتە ڕوو. ئەمەش ئەو تایبەتمەندییانەیە کە بۆپێشەوە لە هەموو میدیاکانی تری بیستراو بینراو نووسراوی تر جیا دەکاتەوە. ئەو لەکاتی خۆیدا هاتنە دەنگ و ئامادەیی بۆ وەڵامدانەوە بە گرفت و کیشە سەرەکی و گەرمەکان و خستنە رووی ئەڵتەرناتیفی دیاریکراو لە جێگای دریژ دادڕی گشتی و مامەڵەی ئاکسیۆنیستی میدیایی، جیاوازییەکی سەرەکیەتی لەگەڵ ئەو میدیاو کەناڵە چەپانەش کە ئامادەییان هەیە.
بۆپێشەوە لەرێگای سەر وتارو وتارو دوا وتەیەوە، لەسەر گرنگترین مەسەلە و گرفتە سیاسی گەرمەکان لەڕوانگەی چەپ و کۆمۆنیزم، دیتە قسە. لە رێگای دۆسیەکانیەوە، فایلە سیاسیەکان و روداوەکان، لێکدەداتەوە و ریزیکی بەرین لە قەڵەمی چەپ و کۆمۆنیست و ئینسان دۆست، دەدوێنێت. لە رێگای تەوەرەکانیەوە، دیدو روانینی راشکاوی خۆی بۆ پرسە گەرمەکان دەخاتە ڕوو. لەرێگای گۆشەی ژنانەوە، زوڵم و بێمافی ژنان، هۆکاری نابەرابەری هەڵاواردنیان، وە ڕێگای وەدەستهینانی ئازادی و مافەکان و کۆتاییهینانی یەکجاری بەستەم کیشی سەر ژنان دەخاتە روو. وە لەرێگای وەرگێرانەوە دەیان بابەتی رابەرانی بزوتنەوەی کۆمۆنیستی و کریکاریی لە بۆپێشەوەدا بڵاوبۆتەوە. لە ریگای گۆشەی ئەدەب و هونەرەوە، پەیامی هونەریکی ئینساندۆست و ژین دۆست و بۆ گرفتە سیاسی و کۆمەڵایەتییەکان و دیاردەکان، دەخاتە ڕوو.
بۆپێشەوە لەچوار ساڵی رابردوودا، پابەند بە خەتی راگەیاندراوی خۆی و مەوازینی تایبەت بەخۆی بووە… پەیوەندیەکی توندوتۆڵی لەگەڵ دەیان لە رابەرانی بزوتنەوەی نارەزایەتی جەماوەری چەپ و کۆمۆنیست و ئینسان دۆستدا رێکخستووە. لە پەیوەندی توندو تۆڵدا بووە لەگەڵ دەیان کەسایەتی سیاسی بەرجەستە بۆ قسەکردن لەسەر دۆسیە و تەورە تایبەتیەکان. هێڵی بزوتنەوەی یەکسانیخوازی ژنان، نوینەرایەتی کراوە و دەیان ژنی تیکۆشەری ریزی یەکسانی هەمە لایەنەی ژنان وپیاوان بۆپێشەوەیان وەکو سەکۆیەکی بەرگری لە مافەکانی ژنان و ئازادییەکانیان بەدەستەوە گرتووە. دەیان هونەرمەندی دەست ڕەنگین لە رێگای بەرهەمە هونەریەکانیانەوە، بەشداریان لە بۆپێشەوەدا کردووە و غەم و گرفتەکانیان، لە رێگای شیعر، لیکدانەوە بۆ تیکستەکان و کەسایەتیەکان کردووە. بە کورتە چیرۆک و بە هونەری کاریکاتیری ئاست باڵا، واقعیەتی دنیای نابەرابەر و زوڵمستانی دەسەڵاتیان خستۆتە ڕوو… لە رێگای گۆشەی دەمە تەقێوە، بەپیی و توانا ئەدیب و هونەرمەندەکان بەسەر کراونەتەوە…
ئیستا بۆ پێشەوە بە هەوڵ و ماندووبوونی ستافیکی کەم و خۆبەخش، هاوکارانێکی ماندوونەناس، تا ڕادەیەک پەیوەندیەکی توند و تۆڵی لەگەڵ کۆمەڵگەو دەیان هەزار خوێنەردا دروستکردووە… خەت و روئیایی بۆ هەموو کەس و لایەن و گروپێک رۆشنە. بە سوکە نیگایەک لە مانشێت و سەرخەتی بابەتەکانی، جیاوازی ریشەیی لەگەڵ میدیاکانی ترو پەیامی روون و راشکاوی دەبینرێت…
بۆپێشەوە بۆ بەردەوام بوون و بەرەوپیشەوەچوونی زۆرتر و زۆرتری، بۆ پڕکردنەوەی لاوازییەکانی، پێویستی بە قەڵەمی تیژی کۆمۆنیستی، ماکسیمالیست، رۆشن و بەشداری فراوانتری قەڵەمی بلۆکی چەپ و کۆمۆنیست هەیە… هیوادارین لەدەستپێکی پێنجەمین ساڵییدا، ژمارەیەکی زۆتر لەگەڵمان بێن و بۆپێشەوە بەدەستەوە بگرن، کەموکوڕییەکانی چ لەباری ناوەرۆک و چ لەباری فۆرم و مۆنتاژەوە پر بکەنەوە، گۆشەی تری بۆ زیاد بکەن… وە بەدەستیەوە بگرن.
بۆپێشەوە سەکۆی گێرانەوەی ئیرادەیە بۆ ئینسان، بڵندگۆی سازدانی شۆرشی کۆمەڵایەتی چینی کریکارە، مینبەری شۆرشی کریکارییە لە کوردستان. با ئێمە چەپ و کۆمۆنیستەکان بەدەستیەوە بگرین و لەو رێگایەشەوە میدیای چەپ و کۆمۆنیستی بکەینە چرا و قیبلەنوومای رۆشنکردنەوی ئایندەیەکی گەشاوە و چوارچێوەیەکیش بۆ ریکخستن وسازدانی شۆڕشی بێبەشان…