جوڵە و کات لەبزاوتی تابلۆکانی (مارکۆ گراسی) دا خوێندنەوەی هونەری/جمال نوری
جوڵە و کات لەبزاوتی تابلۆکانی (مارکۆ گراسی) دا
خوێندنەوەی هونەری/جمال نوری
نیگار بەرهەمی وێنەیەکە چاو گرتویەتی. “هونەری چاویی”، بەڵام چاو تەنها کەرەستەی بایولۆژی وێنەگرتن نییە” لانی کەم لای (نیگارکێشەکان”)، دونیابینی هەیە، (تەئەمولاتی) هەیە، (تاقیکردنەوەی) هەیە، (جوڵە وکات) و (بزاوتنی) هەیە و بەهەموو ئەو شتانەی دەوروبەری (مانا و روح) دەبەخشێت. بەتابلۆکانی (مارکۆ گراسی) .
نیگار شیعرێکە “چاو” نوسیویەتی، داستانێکە نیگارکێش، بە ڕەنگ و تۆنی ڕوناکی و هێڵەکان وخاڵەکان و فیگورەکانی دەینەخشێنێت.
چاوم دیوە پڕپڕ ئاگر بووە، لێون لێو بووە لە جامی میهر پڕنزاو پارانەوە بووە. چاوم دیوە گەشتنامەی ژیان بووە.. چاوم دیوە رۆحێکی ناسک و سەدان مۆمی تیا داگیرساوە. هەر یەکچاو بووە، تەنها یەکچاو، بەڵام سەربردەیی شکانی تیشکی ئومێد و چارەنوسی بەدبەختی وکڵوڵی ئاوارەیی و دەربەدەری ژنی گێڕاوەتەوە. وەک چاوی هونەری و بیرو ڕامانی(مارکۆ گراسی)، لەوێناکردنی وێنای ژن و ئینساندا وەها وێنایکردوە، وەک ئەوەی هەست بە ترپەی لێدانی دڵیان بکەی لەناو تابلۆکانیدا، وەک ئەوەی لە نمایشێکی ڤیستیڤاڵی جیهانیدا ئەم کاراکتەرانەی (گراسی)، لەسەر شانۆی هونەر ڕۆڵی کۆمپارس بگێڕن، بەبێ لێدوان، ئەمە بەهرەی عیملاقی (گراسی) هونەرمەندە وێنای تابلۆکانی لەڕێگای تیشکی سیحری چاوەکانیەوە ئەیاندوێنێ، بەڵێ چونکە چاو، ڕاستگۆترین زمانی شوناسی ناوەوەی رۆحی ئینسانە.
نیگای (مارکۆ گراسی) “لەوێناکردنی شێوەو ڕووخسارەکانی ژن یان پیاو، بێت، ئەو ڕوحیان پێ دەبەخشێ وەک هونەری شێوەکاری یان هەست بەجوڵەو کاتی کاراکتەرەکانی (دەکەیت)، هەست بە ڕامانی چاوەکانیان ئەکەیت، وەک ئەوەی بیانەوێ بدوێن لەڕێگای چاوەکانیانەوە، حیکایەتی بوون و شوناس و سروشتی ئینسانیان بخاتە ژێر پرسیارە جەوهەریەکانی هونەرەوە، هونەرمەندی به توانای جیهانیی (مارکۆ گراسی) هونەری شێوەکاری لەشێوەو فۆرم ڤیگۆرێکی مۆدێرندا بەرجەستە ئەکا.
شێوازی تەکنیک و هێڵ و وردەکارییە شوێن هەڵگرەکان، لە نێو تابلۆکانیاندا، هێندە وردن وەک لەتاقیگەی دۆزینەوەی وردترین ڤایرۆسدا کاربکات، ئاوها مارکۆ گراسی ئیشی لەسەر بەرهەمهێنانی پیشەسازی هونەری شێوەکاریدا کردوە، بەجورێک گومانیان لادروست کردوم، گومان بەمانا (بارت) یەکەی، وایلێکردوم دیوی ناوەوەی تابلۆکانی مارکۆ گراسی شیتەڵ بکەمەوەو هەڵکوڵین لەناوخودی تابلۆکانیدا بکەم.
ئەم تابلۆیەی (مارکۆ گراسی) شێوەی ژنێک نمایش دەکات، لەلایەک دڵشاد دەیەوێ بڵێ ژن لەوێنای گشتییەکەیدا، کائینێکی ناسکەو میهرەبانە و لەفیردەوسەوە هاتوە، دەبێ ڕێزی لێ بگیرێ و جوانترو جوانتر وێنا بکرێ لێوەی ڕابمێنرێ.
چاو بە درێژایی مێژووی پۆرتریەت، گرنگترین بەشی داگیرکردووە. چاو دکیومنتەیشنی کەسایەتی و مۆرکی ڕاستەوخۆی جیهانبینی نیگارکێشی بەرجەستەکردۆتەوە. نیگار زمانێکی جیهانی کاریگەرتر لە مۆسیقا بووە، کێشە گەورەکانی ئینسانیەت، نەمری، بەختەوەری، ئازادی و یەکسانی، لەچاوی پۆرتریتەکاندا دەخوێنینەوە.
ئەو دەمانەی ئینسانەکان زۆر نزیکتر لە سروشتێکی پەتی و لەگیانەوەران ژیاون، وێنەی ئەوانیان بە دیقەتەوە کێشاوە، ئەو دەمانەی ئینسانەکان خۆیان وەک تێکەڵەیەک لەبوونی خودایی و ئینسانی و تامەزرویی نەمری بوون، نیگاری هاوبەشی خۆیان کێشاوە، ئەو دەمانەی پاشاکان وجەنگەکان، یان کارەساتەکان پانتاییەکی گەورەیان لە ژیانی مرۆڤایەتی داگیرکردووە، نیگارکێشەکان،
بەرهەمەکانیان دەربڕی ئەو دەورەیەن.
کاتێکیش نیگارکێش، دەیەوێت وێنەیەکی تر، ئینسانێکی فەرامۆش کراو، چاوێکی ناڕازی، ژنێکی باوەڕبەخۆ و ئازاد، پەنابەرێکی نزیک سەنتەری شار، وێنە بکێشێ، ئەو کەسانە دەدوینێ و دەیگوازێتەوە بۆ دونیای جوانی نەمرییەوە، کەلە کلتووری نیگارکێشی ئەمڕۆدا فەرامۆشکراون.