ڕێگاوبانی کوردستان و چاکسازی بورژوازی کوردی

0
کامل احمد                                                               kamil.ahmed.f@gmail.com
ڕێگاوبانی کوردستان و چاکسازی بورژوازی کوردی
لە وتاری “چاکسازی پڕۆلیتاریی و چاکسازی بورژوازی” دا، ئاماژەم بەوەدا کە چاکسازیەکانی بورژوازی کوردی و هەردوو حزبی دەسەڵاتدار کە خەریکن هەموو کوردستان لەژێر بەیداخی بە ناو حکومەتی هەرێمدا ڕادەستی کەرتی تایبەت دەکەن و خەریکن بەشێک لە “ئاوی کەوسەر و خاکی گەوهەرەکەشیان” هەڕاج فڕۆش دەکەن نەک هیچ پەیوەندیەکی بە باشبوونی ژیانی خەڵکەوە نیە، بگرە بە تەواوی دژ بە ژیان و گوزەرانی ئەوانە. هەموو ئەو چاکسازیانە بۆ شانخاڵیکردنەوەی خۆیانە لەژێر باری هەر بەرپرسیاریەتیەک لە بەرامبەر ژیان و گوزەرانی هاوڵاتیانی کوردستاندا. ئەوان وەک لەو وتارەی پێشوودا ئیشارەم پێدا خەریکی جێبەجێکردن و بردنە پێشەوەی سیاسەتەکانی بانک و سندوقی دروای نێودەوڵەتین. ئەوان دەیانەوێت وەک بەشێک لە بورژوازی بیسەلمێنن کە هەوڵدەدەن لە کاروانی چینەکەی خۆیان دوانەکەون و مەرامی کۆمپانیا جیهانی و ناوخۆییەکان جێبەجێدەکەن. وە لە ڕاستیدا، بورژوازی کورد لەمبارەوە پێشڕەوە و تەواوی کەرتەکانی بەرهەمهێنان و خزمەتگوزای بەتایبەتکردووە و فەرسەخێک لە پێش بەغدا و تەنانەت وڵاتانی ناوچەکەوەیە بۆ خزمەتکردنی چینە جیهانیەکەی خۆی.
بۆ پشتڕاسکردنەوەی ئەم واقعیەتە تاڵەی ژیانی خەڵکی کوردستان با چاوێک بە بەرنامەی “لەگەڵ ڕەنج” لە تۆڕی میدیایی ڕووداو کە شەوی دووشەممە ١٤/٠٩/٢٠٢٠ پەخشکرا بخشێنین کە باسی پڕۆژەکانی ڕێگاوبان و کەموکوڕیەکانی لە هەرێمی کوردستان دەکرد و تیایدا سدقی ئامێدی، بریکاری وەزارەتی ئاوەدانکردنەوەی هەررێمی کوردستان یەکێک لە میوانەکانی بەرنامەکەی بوو . ئەم بریکارەی بورژوازی و ئەحزابی دەسەڵاتی کوردی ڕاشکاوانە ڕایگەیاند کە ئەوان خەریکی چاکسازین و خەریکی لێدانی ڕێگاوبانی تازەن لە کوردستاندا کە ئەوان هیچ بەرپرسیارێتیەکیان نیە لێی و ڕادەستی کۆمپانیایان کردووە و هیچ تێچوویەکی ناکەوێتە سەر حکومەت. بە مانایاکی تر ئەوە هاوڵاتیانی کوردستانن کە ئەو ڕێگایانە لە داهاتوودا بەکاردەبەن و دەبێت باجەکەی بدەن و بە تێپەڕبوون بەو ڕێگا خێرایانەدا دەبێت بڕێک پارەبدەن. دیارە ئەم جۆرە لە چاکسازی کە بورژوازی کوردی دەیەوێت پێیدا ڕابگات سەردەمانێکە لە هەندێک لە ووڵاتانی ئەوروپی بەڕێوەدەچێت و هەمیشە جێگای ناڕەزایەتی خەڵک و بەکارهێنەرانی ڕێگاوبانەکانە. هاوکات دەسەڵاتی میلیشیایی بورژوازی کورد دەیەوێت ئەمە بە چاکسازی و باشبوون لە ستانداردی ڕێگاوبانەکان و باشبوون و بەرەوپێشچوونی خزمەتگوزاریەکان لە کوردستاندا بە خەڵکی ستەمدیدە و پڕۆلیتاریای بێبەشی کوردستان بفڕۆشێت.
ئەم جەنگاوەری بورژوازی نیولیبڕالی کورد ڕاشکاوانە ڕایگەیاند کە هیچ باکێکیشیان بە ناڕەزایەتی خەڵکی کوردستان نیە و ئامادەنین لەژێر هیچ فشارێکدا لەم بڕیارەیان پاشگەزببنەوە. ئەم بەڕێزە سەغاوەتێکی گەورەی نیشاندا کە ڕایگەیاند خەڵکی کوردستان دەتوانن ڕێگاو بانە کۆن و بێ خزمەتکان، کە بوونەتە مایەی مەرگی هەزاران هاوڵاتی کوردستان، بە خۆڕایی دەهێڵێتەوە و بەمە دەیەوێت فەزلفرۆشی بکات بەسەر خەڵکی کوردستاندا.
ڕاگەیاندنی ئەم بەڕێزە بۆ بە تایبەتیکردنی کەرت ڕێگاوبان و دانانی باج لەسەر ڕێگاکان و ڕادەستکردنیان بە کۆمپانیا وەبەرهێنەر و تایبەتەکان یەکێکە لەو بزمارانەی کە بورژوازی کوردی دەیەوێت لە تابوتی خزمەتگوزاریەکانی بدات. ئەم هەنگاوە درێژکراوەی هەمان ئەو بەرنامە و پلانەیە کە بریکاری وەزارەتی پلاندانانی هەرێمی کوردستان، زاگرۆس فەتاح، هەر لە هەمان بەرنامەوە لە کۆتایی مانگی حوزەیراندا ڕایگەیاند کە دەسەڵاتی بورژوازی کوردی بڕیاری داوە کە کەرتی خزمەتگوزاریە سەرەکیەکان بداتە دەست کەرتی تایبەت. هاوکات بێشەرمانە ڕاشیگەیاند کە کە بڕیاریانداوە هەرسێ سێکتەری ” ئاو، کارەبا و ڕێگاوبان” بدەنە کەرتی تایبەت. ئەم کەرتانەش پەیوەست دەبن بە بەشێکی زۆر لە خزمەتگوزاریەکانی تر کە هاوڵاتیان ناچارن بە پارەیەکی زۆر بیکڕن و لێی بەهرەمەندبن وەکو بەشێک لە کەرتی تەندروستی و شارەوانیەکان و چەندین خزمەتگوزاری تر. بەتایبەت خەڵک ناچارە کارەبا و ئاو و تەندروستی و خوێندن بکڕێت. بەم چاکسازییەی بورژوازی کورد، بەشی زۆری پرۆلیتاریا و نەوەکانیان لە کوردستان بێبەش دەبن لە تەندروستی گونجاو و کارەبای بەردەوام و خوێندنی گونجاو.
کەواتە بورژوازی خەریکی چاکسازیە بە قازانجی خۆی و چینەکەی و چاکسازی ئەو بە مانای ماڵوێرانی و نەهامەتی پڕۆلیتاریای کوردستانە. پرۆلیتاریای کوردستان ئەرکیەتی کە بە هێزی ڕێکخراو یەکگرتووی خۆی و بە هەموو شێوازێک لەبەرامبەر ئەم چاکسازیانەی ئەواندا بوەستێت و مل نەدات بە بێکاری و برسیەتی و گرانترکردنی نرخی کارەبا و ئاو و باجی ڕیگاوبان و بە تاڵانبردنی بەرووبوومی کۆمەڵگا لە لایەن ئەم کەمینەی بورژوازی دەسەڵاتدارەوە. ڕاگەیاندنی چاکسازی پرۆلیتاری، خەباتی یەکگرتوانەی پرۆلیتاریایە دژ بە چاکسازی بورژوازی، خەباتە لە پێناو موچەی تەواو و بەرزکردنەوەی موچە، خەباتە دژ بە بەرزبوونەوەی نرخی پێداویستی و خزمەتگوزارییەکان.
17.09.2020

بە پێویستم زانی لینکی هەواڵەکەش لێرەدا دابنێم ئەگەرچی بەرنامەکە تەلەفزیۆنی بوو: https://www.rudaw.net/sorani/kurdistan/1409202016?fbclid=IwAR3tswhblTmCUs9rMqGdfDbIvK_fgGRoIcQddm3BWUrVRw7FHNaCapMvE_w

 

Leave A Reply

Your email address will not be published.