لاقەکردنی ئافرەتان لە کێبڕکێی کورد و حەشدی شەعبیدا
لاقەکردنی ئافرەتان لە کێبڕکێی کورد و حەشدی شەعبیدا
نووسینی: شوانە حەسەن ئەبوبەکر
دەستدرێژی سێکسی بۆسەر ڕەگەزی مێینە لە چوارچێوەی یاسا و ڕێسا نوێباوەکاندا بریتیە لە پڕۆسەیەکی تابۆکراو لە فەرهەنگی مرۆڤایەتی، لەخانەی جیهانبینی ئایننەکان بە جۆرێک تەحریمکراوە کە شوناسی زیناکردنی پێدراوە، لەخانەی یاساو ڕێسا فیمینیزمە نوێباوەکانیش سێکسی بەزۆر بریتیە لە لاقەکردن و لاقەکەرانیش بریتین لە مرۆڤانێکی یاساشکێن، شکاندنی یاساش ڕۆشنە کە بکەرەکەی سزادانی توندە، جا ئەم لاقەچیانە مرۆڤانێکی نۆڕماڵ بن یا خوا پێدراوێکی حزبی یا پیاوانێکی کەشیش و ئەهلی دین بن وەک لە کەنیسەکانی خۆرئاوایی ساڵانە لاقەکردن بەدەستی ئەمانە لە دژی ڕەگەزی مێینە باوە .
لە کۆمەڵگە خۆرهەڵاتیەکاندا بە کوردستانیشەوە بەو پێیەی تڕادسیۆنی ئاینی تیایاندا تەواو زاڵە بۆیە بەهەموو پێودانگەکان پرسی لاقەکردن دۆسێیەکی بڤەکراوە، هەمدیسان لە کوردستانی دوای ڕاپەڕینیش بەهۆی لەدایک بوونی ژمارەیەک لە ڕێکخراوە فیمینیزمەکان وەک دیاردەیەکی مۆدێرنە، کە ئەم ڕێکخراوانە ساڵانێکە لە خەباتی (سیاسی و ئایدیۆلۆژی) بەردەوامدان بۆ دەستەبەری مافە سیاسی و یاسایی و ئابورییەکانی ژنان و دژی توندوتیژی و لاقەکردنی ژنانن، بەرئەنجام ئەم خەباتەیان فاکتەری لەدایکبوونی ژمارەیەک یاسای ئاسنینی دژ بە توندوتیژی و لاقەکردنی ڕەگەزی مێینە بوو لە هەرێم، بەڵام دەکرێت بپرسین کێن ئەوانەی ئەم یاسا ئاسنینانە ژێرپێدەخەن و ڕێزیش لە تڕادسیۆنی کوردەواری و ڕیسا باوەکان ناگرن و ناوە ناوە لێرەو لەوێ گوێبیستی لاقەکردنی ئاشکرای ڕەگەزی مێینە دەبین؟
لەکۆمەڵگە خۆرهەڵاتییەکان بە گشتی زۆرینەی لاقەکارانی ڕەگەزی مێینە بەبەرخۆرەوە ئەو کەسانە نین کەمرۆڤانێکی نۆرمال بن، بەڵکو بکەرەکان مرۆڤگەلێکی نائاساین کە خۆیان حەسانەیەکی شۆڕشگێرێتی سەرو دادگا و یاسا و لێپرسینەوەیان بە خۆیان و ڕەعیەتەکانیان بەخشیوە کە ئەمانەش مرۆڤە شۆڕشگێرەکانی بەناو دوێنێ و کاراکتەرە حزبیەکانی ئەمڕۆ و هەندێک جار مورید و پاسەوان و سێبەرەکانیانن .
لە کۆمەڵگەی عێڕاقی کۆندا ئەو کەسە هەمیشە لەسەر خوانەکەی (صدام) بوو لە خێزانەکەیدا کە شەیدای لاقەکردنی کچان بوو، لە زانکۆکانی (موستەنسریە و بەغداد) بەدوای خوێندکارە کچەکاندا دەگەڕاو غەریزە ئەهریمەنیەکەی خۆی لێتێر دەکردن، لە دەوڵەتی لیبیای (موعەممەڕ قەزافیش) چیڕۆکی ئەو خوێندکارە هەرزەکارەمان بیستوە کە لەسەردانەکەی سەرۆکدا بۆ خوێندنگەکەی لەتەڕابلوس هەر بەبینینی دڵە نەخۆشەکەی سەرۆک ئەوینداری دەبێت و چێرۆکەکەش بە چەند جارێک لاقەکردنی کۆتایی پێدێت، ئەم ڕێگە بەخۆدانەی سیاسییەکان بە شکاندنی تابۆکان لەو دیدە شۆڕشگێریەوە سەرچاوەی گرتووە کە لایان وایە دەوڵەتی نوێ بەرهەمی سەنگەرلێدان و قوربانیدانی جەستەیی و فیکری موریدو شۆڕشەکەی ئەوانە، هەر بۆیە ئەوان بەجۆرێک پیرۆزن هەرچی هەیە لەکۆمەڵگەدا خاوەندارێتی بۆ ئەوان دروستە (لە کچان و نەوت و داهاتە ناوخۆکان و هەتا بە وراسی کردنی کورسی حکومڕانێتیش) بۆیان یاساغ نییە و ڕێگەپێدراوە .
کۆتاییەکانی ساڵی ڕابردوو بوو کاتێک ژمارەیەک چەکداری حەشدی شەعبی لە شارەدێی پردێ لاقەی کچە کوردێکی کەم ئەندامیان کرد، ئەوکات بازرگانەکانی کوردایەتی لەناو حزب و مافیاکانی نەوت لە ناو حکومەتی هەرێم دوو بەیاننامەی توندیان دەرکرد بەمەبەستی دروستکردنی کاریگەری لەسەر هەست و سۆزی تاکی کورد و خۆ بەپاڵەوانکردنیان، کە پڕبوو لە هەڕەشەکردن و چاوسورکردنەوە پەنجە ڕاوەشاندن لە حەشدی شەعبی هاوشێوەی زەمەنی ڕیفراندۆمەکەیان کە خۆیان گوتەنی حەشد بریتیە لە هێزێکی (بەربەری و کوردکوژو مەزهەبگەرای سونەتی)، بێگومان ئەوکات هەموان ئەوەندە سادە بوین زۆر دڵمان بەم پەنجە ڕاوەشاندنە کرایەوە و ئاهێکمان بەبەردا هاتەوە و گوتمان کورد لە بێکەسی ڕزگاری بوو ئەوجار فڵانە سیاسیە هەموو کەسی کوردە، بەڵام زەمەن چرکەکانی زۆر وەرنەچەرخاند کە لاقەکردنی کچێکی پەپولەئاسای تەنیا (٧) ساڵانمان لە پایتەختەوە بیست، لاقەکردنێک بەدەستی حەشدی عەرەبچی و بەربەری و داگیرکەر نا، بەڵکو ئەمجارەیان لاقەکردنەکە لەسەر دەستی ژمارەیەک لە پاسەوانەکانی پلەباڵایەکی حزبی لە پارتێکی دیموکڕاتخواز!! و بیناکەری خەونی دەوڵەتی کوردی و پارتێک کە هەڵگری ئایدیای نەتەوەیی بوون بوو، بەڵام سەمەرەکە لێرەدایە ئەو سیاسەتکارەی لە زەمەنی لاقەکردنەکەی پردێدا قامکی توند ڕادەوەشاند کەچی ئەمجارە لە دۆسێی لاقەی کچەهەژارە (٧) ساڵیەکە خیاری دوالیزمئاسای بانێکەو دوو هەوای هەڵبژارد، بۆیە نەمانبیست هیچ قسەیەک بکات لە ئاست تاوانەکە .
لە کۆتایدا حەشدی شەعبی بەربەری و داگیرکەر لاقەکارانی دۆسێی کچە کوردە کەمئەندامەکەی پردێی دەستگیرکردن و ڕەوانەی بەردەم دادگایکردن بۆ وەرگرتنی سزاکانیان، بەڵام بەتەنیشت ئەم هەنگاوەی حەشدی دژە کوردەوە لای نەتەوەچییە کوردەکان لە شاری هەولێر شانۆکە تەواو پێچەوانەترە، لێرە لە جێگەی سزادانی جەلادەکان و جێبەجێکردنی یاسا فیمینزمیەکان بەسەریاندا کەچی لەپڕ کەلەپچەیەک کرایە دەستی باوکی کچە قوربانیەکە (لوقمان ئیسماعیل) و بە تۆمەتی ناوهێنان و ناساندنی جەلادەکان بەڕای گشتی کوردستانی کە ئەم کارەش بەلای ئەوانەوە تەشهیرکردنی جەلادەکان و ئاغاکانیانە، کەلە واقعدا ئامانجی کەلەپچەکردنەکەی قوربانیەکە بۆ ترساندن و ناچارکردنیەتی بۆ ئەوەی هاوشێوەی کۆمەڵگە بەربەریەکانی بەر لە یاسا و شارستانیەتە کۆنەکانی دونیا ئەمانیش لە جێگەی دادگا و یاسا دۆسێی کچەکە بە پارەی دزراوی خەڵک و لەڕێگەی سوڵحی عەشایەریەوە وەک زۆرێک لە دۆسێکانی تر ئەویش، دیزەبەدەرخۆنە بکەن .
خۆش دیموکڕاسیەت و خۆش ئایدیای دەوڵەتی کوردی و خۆش یاسا و دادگای مۆدێرن لە مەملەکەتێک بەبەرخۆرەوە کچ لاقە بکرێت و یاسا ئەتک بکرێت، بەڵام تەنیا لەبەر گوتنی (نا بۆ لاقەکردنی کچە ٧ ساڵانەکەم ) قوربانیەکە کەلەپچە بکرێت وجەلادەکانیش لەسەر شەقامەکان پیاسە بکەن و بەدوای
نێچیری چەورتردا بگەڕێن، هەزار ڕەحمەت لە بیری هاوڕێیەکم کە لەسەر ئەم پرسە گوتی: کوردستان وا خەریکە بە ئاقارێکدا دەبرێت کە بازرگانەکانی کوردایەتی سەرباری دزین و تاڵانکردنی ڕۆژانەی داهاتی خەڵک و برسیکردنمان کەچی لەولاوە کاتێک ئارەزویان دەبزوێت و لاقەمان دەکەن نابێ هیچ بڵێین یاخود بڵێین دەستان خۆش بێ، چونکە دەستەواژەی (نا) چەمکێکی بڤەیە و ئەوکات مافی خۆیانە کەلەپچەیەک بکەنە دەستمان…