ڕەنجدەر گڕاوی: دەبێت خەڵک و گروپە ناڕازییەکان لە چوارچێوەی پلاتفۆرمێکی هاوبەشدا کۆببنەوە بە ئاشکرا و بەبێ سڵەمینەوە دوای ڕووخانی ئەم حکومەت و سیستەمە مافیاگەرییە بکات. تا ئەمە نەکرێت ژیان و گوزەرانی خەڵک خراپتر دەبێت باشتر نابێت
ڕەنجدەر گڕاوی: دەبێت خەڵک و گروپە ناڕازییەکان لە چوارچێوەی پلاتفۆرمێکی هاوبەشدا کۆببنەوە بە ئاشکرا و بەبێ سڵەمینەوە دوای ڕووخانی ئەم حکومەت و سیستەمە مافیاگەرییە بکات. تا ئەمە نەکرێت ژیان و گوزەرانی خەڵک خراپتر دەبێت باشتر نابێت
دیمانەی بۆپێشەوە لەگەڵ بەڕێز ڕەنجدەر گڕاوی چالاکوانی سیاسی و مافی مرۆڤ سەبارەت بە ناڕەزایەتیەکانی هەرێمی کوردستان.
بۆپێشەوە: جارێکی تر خەڵکی نەدار و بێکار و برسی و بێ موچە، دەستیان داوەتە ناڕەزایەتی و بەشێکیان هاتوونەتە سەر شەقام، هۆکاری ئەم ناڕەزایەتی و خۆپێشاندانانە چییە؟
ڕەنجدەر گڕاوی: هەرێمی کوردستان و چارەنووسی ئەو خەڵکە 30 ساڵە کەوتۆتە دەست هەردوو حزبی پارتی دیموکراتی کوردستان و یەکێتی نیشتمانی کوردستان، بینیمان چ جۆرە سیاسەتێکیان بۆ سیستەمی ئیداریی بەکار هێنا، و چۆن هاوڵاتی و ئەم نیشتمانەیان بەڕیوە برد. هەر لە ژێر سایەی ئەمانە؛ دزی و فەسادی زیادی کرد، پەیوەندییە بەهێزەکانی کۆمەڵگەیان بەم ئاقارەدا برد، وایان کرد متمانە و خۆشەویستی ناو خێزان و تاکەکانی کۆمەگا نەمێنێت، ئەمە هۆکاری هاتنەسەر شەقامی خەڵکە، لەپاڵ هۆکارە ئابووریەکەش کە هۆکاری دووەمی ناڕەزایی خەڵکە.
بۆپێشەوە: بەشی هەرەزۆری خەڵکی کەم دەرامەتی کوردستان، ژیان و گوزەرانیان تا دێت بەرەو خراپتر دەچێت، ئەم خەڵکە چی بکات بۆ بەرگری لە ژیان و گوزەرانی؟
ڕەنجدەر گڕاوی: سەرەتا، هەموو شتێک بریتیە لە وازهێنان لەوەی چیتر لەم دەسەڵاتە هیچ و پوچ و مافیا گەریە ببپارێینەوە، و داوای چاکاسازیان لێبکەین. بەڵکو دەبێت بڵێین بڕۆ ئیتر تۆمان ناوێت، دەسەڵاتێک سەرخان و ژێرخانمان فەرهود بکەن! هیچ چاوەڕوانیەکی لێناکرێت. بۆیە دەبێت خەڵک و گروپە ناڕازییەکان لە چوارچێوەی پلاتفۆرمێکی هاوبەشدا کۆببنەوە بە ئاشکرا و بەبێ سڵەمینەوە دوای ڕووخانی ئەم حکومەت و سیستەمە مافیاگەرییە بکات. تا ئەمە نەکرێت ژیان و گوزەرانی خەڵک خراپتر دەبێت باشتر نابێت.
بۆپێشەوە: ئایندەی ناڕەزایەتی و خۆپیشاندانەکانی ئێستای خەڵکی کوردستان چۆن دەبینن؟
ڕەنجدەر گڕاوی: بۆ وەڵامدانەوەی پرسیارەکەتان دەبێت لەو وشانەوە دەست پێبکەین کە پرسیارەکەتان لێ دروست کردووە، کە من لەوێدا قسە لەسەر (ئایندە) و (ناڕەزایی) و (خۆپیشاندان) دەکەم.
لە باشووری نیشتیمان دەسەڵاتێکی ستەمکار هەیە، کە لە بەشێکی بچووکی ئەو نیشتیمانەدا هەرێمێکیان بۆ جیاکردوونەتەوە، ناویان لێناوە” هەرێمی کوردستان”، ئەو هەرێمەش حکومەتێکی کارتۆنی بۆ دروستکراوە، کە بە دەستی دوو حیزب و دوو بنەماڵەی خێڵەکی بەڕێوە دەبرێت، هەر یەک لەو حیزبانە سەر بە یەکێک لە داگیرکەرەکانی کوردستانە. جگە لەو هەموو تەونی سیخوڕیی و دەزگا هەواڵگریانەی کە تێیدا بڵاو بوونەتەوە، جگە لە دەزگا سیخوڕییەکانی خۆیان وەکو دەزگای زانیاریی، دەزگای پاراستن، دەزگای دژە تیرۆر، ئاسایش و هێزی میلیشاتی حیزبەکان، کە هیچ خەسلەتێکی نیشتیمانیان تێدا نییە، هەمووی بۆ سڕکردنی جووڵانەوە و چالاکی سیاسیی و مەدەنی ناو کۆمەڵگە ، کارا و چاوکراوەن، هەناسەیان لەو میللەتە بڕیوە و ناهێڵن هیچ جوڵەیەک بکات و دەنگی ناڕەزایی و داواکارییەک هەبێت. سیستەماتیک ئەم دەسەڵاتە کار لەسەر بە گەمژەکردنی کۆمەڵگە و خەڵکی کوردستان دەکات.
لە ناو سیستەمێکی ئاوادا زەحمەتە کار لە سەر یاسا و دەستور بکرێت، بڕوا ناکەم کەس دژی ئەم بۆچوونە بێت، ئەگەر بڵێم لە هەرێمی کوردستان بە مانا دیموکراتیی و سیستەمی بەڕیوەبردنی هەموو حکومەتەکانی دنیا، نە یاسا هەیە و نە دەسەڵاتی ئیداری، تەنیا وەکو فلیمێکی کاوبۆی ئەمەریکی کۆمەڵێک دز و چەتە پەلاماری نیشتیمانێکیان داوە خێر و بیری ئەو وڵاتە دەدزن و داگیرکەر و دوژمنانی کوردیش ڕەواییان بەم چەتە و دزانە داوە و بێدەنگن.
ناڕەزایی هەیە، بەڵام لە ئاستی پێویستدا نییە، خەڵکەک بێزارن، بەڵام هەر کەسە لە ناخی خۆیدا پەنگی پێ خواردۆتەوە، دەیانەوێت شتێک روو بدات، بەڵام نازانن پاشەڕۆژی گۆڕانکاریی چی دەبێت، دەیانەوێت ئەو حیزب و دەسەڵاتە نەمێنێت، بەڵام نازانن کێ لەدوای ئەوان دێت. خەڵکەکە چارەی حیزبەکانی ناوێت، بەڵام نازانن لە دوای ئەوان کێ دێت و چارەی جوان دەبێت و هەمان هەنگاوی ئەوان نانێت و مێژوویان بۆ دووبارە نابێتەوە.
خۆپیشاندان چارەسەر نییە، چونکە خۆپیشاندان لە وڵاتێکدا مان و ڕەوایەتییەکی دەبێت، کە خۆپیشاندەران دەستکەوتی سیاسیی و ئیداریی تێدا بێت، ئەمانە هیچی نایەتە دی، چونکە دەسەڵاتەکە بە ساختە و بە دەنگی تەزویر خۆی سەپاندووە، دەنگدان و هەڵبژاردن فێڵێکە ئەمانە لە خەڵکی دەکەن، تا مانایەک بە بوونی خۆیان لە ناو حکومەت و دەسەڵاتە سیاسییەکی خۆیانە بدەن.
وڵاتانی تریش بروایان پێ بکەن. لە هەرێمی کوردستان هەموو شتێک فەل و فێڵە، حکومەت فەل، حیزب فەل، ئۆپۆزیسیۆن فەل، ناڕەزاییتییەکانیش بە فەل کراوە، بۆیە ئێمە بڕوامان بەو دەنگی نارازییەش نییە کە دەسەڵات ڕێگای پێداوە، بڕوامان بەو خۆپیشاندانانەش نییە، کە دەسەڵات لێی بێدەنگە، بەو دروشم و داخوازیانەش نییە کە ئەگەر جێبەجێ کرا، خەڵکەکە بیدەنگ دەبن و دەچنە ماڵی خۆیان. کە دەشڵێم ئێمە لە وەڵامی پرسیاری دووەمدا دەستی بۆ ڕادەکێشم.
بۆ پێشەوە: نەک هەر موچەی فەرمانبەران کەمە و دوا دەخرێت، بەڵکو دووبارە هەڕەشەی کەم کردنەوەو بڕینیشی هەیە، هۆکاری ئەمە چییە؟
رەنجدەر گڕاوی: وەکو لەسەرەوە باسم کرد، پێش ئەوەی بێمە سەر وەڵامدانەوەی ئەم پرسیارەشتان، دەمەوێت ئاماژە بە خاڵێکی گرنگتر بدەم، ئەویش ئەوەیە: کە خۆپیشاندان لە ناو سیستەمی حوکمڕانی هەرێمدا گەورەترین هەڵەیە، کە خەڵکی پەنای بۆ دەبەن. خۆپیشاندان داخوازییەکی بچوکە، کە دەسەڵات لەو داخوازییە بە کەمتر ڕازییە پێت بدات، موچە مافی کارکردنە کە کەسێک لەبەرامبەر بەجێهێنانی کارێک لە خاوەن کاری وەردەگرێت. ئەو بڕە پارەیەی کە کرێکار و کارمەند وەریدەگرێت، بەپێی کۆنتراکتێکەوەیە کە پێشوەخت لەسەری رێککەوتوون، کاتێک خاوەن کار ئەو بڕە پارەیە بە زیاد دەزانێت و پەشیمان دەبێتەوە، بەپێی گرێبەستەکە نابێت کرێکار و کارمەندەکە مافی بخورێت و تا ماوەی دیارییکراو دەبێت پابەند بێت بە گرێبەستەکە، لێرەدا جۆری مامەڵەکردنی خاوەن کۆمپانیایەک لەگەڵ دەسەڵاتێکی سیاسیی و ئیداری جیاوازییان هەیە، ئەوانەی بۆ دەسەڵات و حکومەتێک کار دەکەن، هەمووی کاری خزمەتگوزارییە، وەکو کۆمپانیا نییە کە کارمەند و کرێکارەکانی وازیان هێنا، ئیتر ئەو دایدەخات. لێرەدا ئەگەر حکومەت، ئاوا بیربکاتەوە و هەڵسوکەوت بکات، ڕەوای مانەوەی نامێنێت دەبێت بڕوخێت و واز بهێنێت لە خراپترین حاڵەتدا دەبێت بەرپرسەکانی دادگایی بکرێت، بەڵام لەبەر ئەوەی دەسەڵاتەکە ستەمکار و دیکتاتۆرە، بەزۆر دەیەوێت بمێنێتەوە، ئیتر دەرفەتی دیالۆگ و گفتوگۆ نامێنێت، دەبێت خەڵکەکە هەڵوێستێکی دیکەی لەسەر وەربگرێت، ئەوەیش خۆپیشاندان نییە، بەڵکو ڕاپەڕین و ڕاماڵینە.
کاتێك باس لە ڕاپەڕینیش دەکەن، لێرەشدا کێشەیەکی تر روومان تێدەکات، کە دوای نەمانی ئەو دەسەڵاتە ستەمکارە، کێ دەبێتە ئەڵتەرناتیڤ، بۆیە دەمەوێت بە کورتیی بیبڕمەوە، کە هەر خۆپیشاندان و ڕاپەڕێن و ناڕەزایەتیی دەربڕینێک ئەگەر بیروباوەڕ و رێکخراوێك و خۆڕێکخستنێکی لە پشت نەبێت، ئەوا سەرەنجامەکەی بە باشی ناشکێتەوە. ئەوەی لە باشوور دەگوزەرێت، خۆپیشاندانێکی نەزۆک و پووچە بۆیە دیاردەی داخوازی موچە تێدا بەدیدەکرێت، نە داخوازیی ڕوخاندنی ئەو دەسەڵاتە، کە دەبێت بۆ لەمەودوا هەموو داخوازییەکانی خۆپیشاندەران لەوە کەمتر نەبێت، بۆ سەرکەوتنی ئەو داواکارییەش دەبێت رێکخراوێکی نیشتیمانیی و نەتەوەیی پاڵپشتی بکات، دروشمەکانی ئەو رێکخراوە لە پشت پۆستەر و هاواری خۆپیشاندەرانەوە بێت.
قسە لەو بارەیەوە زۆرە، کە دەمەوێت بڵێم من ئێستا لە ناو بزووتنەوەیەکدا خۆم دەبینمەوە، کە هەموو ئەو خەسڵەتانەی تێدایە، بۆیە باسم لە ئێمە کرد، هاوار بۆ ڕووخاندن و نەمانی ئەو دەسەڵاتە دەکەین، و داوای دەکەن کە داواکارییەکان با لە داخوازی بچوک بچێتە دەرێ، مووچە مافی هەموویانە کە کار دەکەن، نەک خێر و سەدەقەی دەسەڵات. سوپاس بۆ ئەو دەرفەتەی کە پێتان دام.