نەبوونی غاز وەک مۆتەکەی سەر ژیانی هاوڵاتیان…
نەبوونی غاز وەک مۆتەکەی سەر ژیانی هاوڵاتیان…
ماوەی زیاتر لە دوو هەفتەیە، بەڵایەکی تر یەخەگیری زوربەی هەرەزۆری خەڵکی بێدەرەتانی کوردستان بۆتەوە… ئەویش نەبوونی غاز و گران کردنیەتی بۆ دوو بەرابەر. دیارە لە بازاری رەش و بە نرخی دوو بەرابەرو زیاتر بەئاسانی دەست دەکەوێت.
خەڵکی کرێکارو هەژارانی کوردستان، بەجیا لەوەی کە دەرگیری بێکاری، گرانی، بی کارەبایی و بێ نەوتی و کەمی خزمەتگوزارییەکان و دەیان موسیبەتی ترن… لەگەڵ هاتنی وەرزی زستان و شەپۆلێکی بەفر و سەرما، گران بوونی غازیش پێ زیاد بوو کە ئەوەندەی تر ژیان و گوزەرانیانی سەخت کردووە… ئەوە لە کاتێکدایە کە داهاتی هەرە سەرەکی کوردستان زۆری نەوت و غازە. ئەوەی کە وای کردووە غاز گران ببێت، راستەوخۆ پەیوەندی بە چاوچنۆکی و ململانێی کۆمپانیاکانی حزبی و سیبەری حزبە دەسەڵاتەکانەوە هەیە… و هاوکاتیش بودەڵەیی و بێدەربەستی حکومەت و دەسەڵاتی چەتەکان دەخاتە روو. حکومەت و دەسەڵات لەهەریمی کوردستاندا، نەک هیچ بەرپرسیاریەتیەک بۆ دابینکردنی ژیان و پێداویستەکانی هاوڵاتیان ناگرێتە ئەستۆ، بەڵکو وەکو ژمێریارێکی بەغداش لە کوردستان، لە داهاتی خەڵکی کوردستان کە لە بەغدا وەری دەگرن، بەشیوەیەکی مافیایی حەپەلوشی دەکەن و داهاتەکانی کوردستانیش دابەشی نێوان خۆیان دەکەن و ئەوەی بۆیان گرنگ نییە، ژیانی هاوڵاتیان و پیداویستی و خزمەتگوزارییەکانیانە… لەبەرامبەریشدا حکومەت و پەرلەمانە کارتۆنیەکەی بەیاسا موچەو ئیمتیازاتەکانی خۆیان بۆ ئێستاو دوای خانەنشینیشی چوار!! ساڵەشیان، زیاتر و چەورتر دەکەن. نەبوونی پیداویستیە زۆر سادەکانی وەکو ئاو، کارەبا، نەوت و لە ئیستاشدا گرانکردنی غاز، تاوانکارییەکی ئاشکرای دەسەڵات و کۆمپانیاکانیانە بەرامبەر بە خەڵکی نەداری کوردستان… لەدۆخێکی ئاوادا تازە ئۆپۆزیسیۆنی بۆرژوازی کورد” نەوەی نوێ” لەجیاتی گوشار هێنان و گرتنەبەری رێگای ناچارکردنی دەسەڵات بە دابینکردنی غاز و خزمەتگوازرییەکان، خۆیان و لەداهاتێک کە لە گەندەڵی ژێر سایەی دەسەڵاتدا و لەقوتی هاوڵاتیان کەڵەکەیان کردووە، لەچەند شارو شارۆچکەیەک خەریکی دابەشکردنی غازن، و دەیانەوێت خەڵک وەکو سواڵکەر رابهێنن و رێگای خەباتکارانەیان بەروودا دابخەن. خەڵکی کوردستان مافی خۆیانە لە داهاتی کوردستان خزمەتگوزارییەکانیان بۆ دابین بکرێت و لە سامانی نەوت و غازیش بەپێی پیویستی بەهرەمەند بن… رێگای پاشەکشە پیکردن بە دزی دەسەڵات و کۆمپانیاکان، گرانکردنی غاز، پیویستی بە راوەستاوی هاتنە مەیدانی جەماوەری هەیە. “نەوەی نوێ” بەدابەشکردنی چەند لیتر غازێک، دەیەوێت خەڵکی کوردستان وەکو سواڵکەر و چاو لەدەستی سەدەقە بکات… ئەم هەنگاوەی نەوەی نوێ نەک ناتوانێ کۆتایی بە گرفتی سوتەمەنی هاوڵاتیان بهینێت، بەڵكو ریگای خەباتیشیان بەلارێدا دەبات… بۆیە خەڵکی کوردستان لەلایەکەوە دەبێ بەدژی دەسەلاتی گەندەڵ و چەتەگەریدا بوەستنەوەو ناچار بە دابینکردنی پێداویستیەکانی لەوانەش سوتەمەنی و غازیان بکەن و لەلایەکی تریشەوە سیناریۆی پوچی بە سواڵکەر نیشاندانی خەڵکی کوردستان لەلایەن رەوتی “نەوەی نوێ” وە لەقاو بدەن.